今日想去行試吓下城門水塘，睇吓可唔可以搵到路去抽水塔行吓。但如果直接由城門兜去下城門水塘又似乎短癮咗啲，所以要將起點揀遠少少由大埔出發，經衛徑行上鉛鑛坳，再兜埋針草先至落去城門開波。最後圍住下城門水塘行咗一個圈，觀察咗周邊嘅環境，但係就冇去到目標水塔。
路線：大埔墟>運頭塘邨>樊仙宮>碗窰路>衛奕信徑第7段>鉛鑛坳>麥里浩徑第7段(草山>針山)>城門水塘主壩>下城門水塘>下城門水塘主壩來回>菠蘿壩
全長：22.8 km
時間：5小時49分
自己又衰漏氣同瞓得晏，攪到11點幾先至由大埔火車站出發。好在今日唔係行長線，應該一定夠時間完成。
轉落去行人隧道。
落隧道之後一直行到尾。順帶一提，由火車站行到去碗窰呢段係市區路，其實可以座23K小巴直接去到新屋家總站先至開始行嘅。只係我個人比較 cheap 想慳番幾蚊所以行路過去。
由行人隧道上返嚟地面，跟住轉左行入商場涼一涼冷氣先。
入去運頭塘新城過一過冷河。
入到商場轉右跟住一直行到尾。
喺商場出嚟之後向小巴站方向直行，去到前面座社區中心就再轉右。
沿行人路出到嚟路口再轉左，跟住就繼續向前行。
行到再見到斑馬線就過對面馬路，跟住轉左繼續行。
行多幾步就會見到有樓梯落去橋底。
落到橋底向前行多少少，跟住就喺右邊條樓梯上返去路面。
跟住再繼續沿路行。
行多一陣會見到右手邊有條橋，有個牌寫樊仙宮同碗窰展覽，不如就去望吓有乜嘢睇先啦。冇興趣睇可以繼續直行，好快就會入到碗窰路開始行山。
結果我都係八八掛掛咁行咗上嚟樊仙宮。
上到嚟又覺得好似冇乜嘢特別，影幾張相就可以走人了。
跟住喺一個隱蔽位置見到個指示牌，但唔知係咪因為個遺蹟比起呢個牌更加隱蔽，定還是係我啲雞肓証又發作，打咗個轉乜都見唔到。都係決定走人。
由呢到轉左行落去。
一轉完個灣即時認得路，已經進入咗衛徑第8段。
行落嚟路口，跟住轉右沿嚟碗窰路行上去。留意旁邊有個鬼祟嘅衛徑W090牌，應該有唔少第一次由鉛鑛坳落嚟嘅山友會搵佢唔到。
繼續沿碗窰路行嚟到呢個分岔路口就照指示牌方向轉左。
繼續靠左，之後一路跟住指示牌向鉛鑛坳方向行。
行到見到呢個樓梯口就轉上去，之後係一條2公里長嘅上斜路段。
上完斜路，到鉛鑛坳了。
睇吓地圖先，跟住就要轉麥徑7經草山同針山落去城門。
唔知幾時鉛鑛坳呢到新加咗兩部加水機，不過比佢呃過一次錢之後我應該唔會再幫襯佢。
呢碌柱都算係地標喎，影張相先。
跟住就起程上草山。
之後又再轉灣，其實麥徑啲指示好充足應該好好難會行錯。
有碌柱喎，即係跟住要上梯梯啦。
上完一大段樓梯嚟到一塊有好多牛牛嘅大草地，就快到山頂了。
上去之後就轉右。
嚟到草山嘅地標，用大帽山嚟做背景影吓舊石。
依，今日枝標冇人喎，拿臨上去影吓相先啦。
山頂可以遠望到成個大埔市中心，用咗兩粒鐘時間由下面行上嚟。
睇完風景休息完就繼續行程，落山向針山進發。 
好鐘意見到藍天白雲，更加鐘意見到呢啲綿花糖雲。
照住指示沿路行。
跟住轉左。
離逺見到個鬼咁尖嘅針山，行上去好似會好辛苦咁喎。
其實行落又唔係好覺，行吓行吓就上到去架喇～
山頂在望了。
上嚟又要影吓個牌先。
成個城門水塘望到晒。
今朝出發時喺火車站買咗個飽，所以今日有放飯時間。吔埋個飽先至繼續行程落山去城門水塘。
見到條主壩，就快到了。
終於嚟到城門水塘主壩了。
開始探路行程，由菠蘿壩去下城門水塘。出發之前影吓呢個冇乜水嘅城門水塘先。
行到嚟路口轉左。
有路牌指示去九龍水塘嘅方向，跟住行就啱。
過咗野餐區之後就開始落樓梯，留意左邊呢條冇標示嘅樓䏲，跟住要由呢條樓梯落去。
落完一段樓梯之後轉右，沿小徑再去。
沿呢段短短嘅引水道再行前多少少，跟住就會見到右邊有一條好長嘅樓梯。
跟住就沿樓梯落去(大鑊了，落幾多要上返幾多架喎?)。
落樓梯途中見到水壩中間嗰條好L凶狠嘅長樓梯。
落到嚟壩底，跟住要再擒一擒條直梯落去。
落嚟之後見到有一個排水口，呢個應該就係水塘上面嗰個排水窿嘅出口。雖然照常理個排水窿係水滿時先至會有水流落嚟，不過為安全計最好都係唔好行入去了。
睇完排水口，跟住就沿住唯一嘅小徑出口繼續行。
跟住沿鐵橋行，前面就係連接城門隧道嘅高架路。
嚟到橋底梗係要影吓相，呢到都算係幾特別。隧道行行吓穿咗出嚟一小段，之後又再入返山窿。
跟住要過橋。
之後沿樓梯上去。
上完樓梯之後就轉左，再沿小徑直去。
呢段似係一條日久失修嘅郊遊徑。
望到少少水塘景。
呢段路有部分係比較崎嶇同窄，如果天氣唔好時免得過就唔好嚟行。但又未至於難行到要靠路邊啲繩嘅，同埋啲繩嘅位置有少少奇怪。
沿路行咗咁耐都搵唔到一個比較開揚嘅位可以影到個水塘。
似係行完呢段要落山了。
依～福街鳥，做乜成日行山都行咗去地盤架。仲有人喺到開梗工，夾硬出去實會比人調。唔通要原路返轉頭？
行落啲睇清楚又好似有路可以行喎。
哦～初時以為今次又賴嘢行咗入地盤範圍，原來地盤係有留通道比人嚟行山嘅。
跟住由呢條黃色鐵梯行落去。
地盤開咗一個路口出嚟比行山人仕出入。
跟住沿馬路行出去水壩。
嚟到下城門水塘主壩，有好多人喺到放飛機喎。
以我嘅性格，梗係會八掛吓人哋放飛機先啦。嘩～呢架係F16嚟喎。
行到水壩另一邊有兩條路可以行，一邊返去城門水塘，另一邊就落去大圍。
靠右邊行，跟住要上一大段斜路。
呢個位有啲古惑，如果唔睇地圖繼續直行行到見掘頭路先至識得返轉就戇居居了。要返去城門水塘，嚟到呢個路口就要轉右落去喇。
轉落嚟之後一直沿路行就得了，吖～條路又幾靚喎。
呢個就係目標抽水塔，今日大致知道咗佢位置同喺佢附近嘅路。之後搵一次早啲過嚟試吓行近啲影吓佢。
沿途有個冇乜特別嘅涼亭。
跟住靠右落斜，再一次落去城門隧道橋底。
其實喺右邊直去好似都有路可以過去水壩，不過條路睇嚟都唔係一般咁險，一個唔小心就以後都唔駛再行山了。為安全計唯有行遠啲落返去壩底再上去。
又返到嚟橋底，過埋鐵橋就可以行返過去水壩底。
跟住又擒呢條直梯返去上。
嘩。。。條樓梯望唔到尾架喎。。。真係要行上去?？
好L辛苦咁行到上嚟主壩，跟住仲要再行多差唔多3公里出去菠蘿壩。
又影吓個水塘先。
正～一出到嚟就有小巴。連雪榚都唔食，拿臨上車走人先。
路線記錄
Total climbing: 1703 m
Total time: 05:48:02
發表迴響