今日行一段比較少人去嘅路線，但佢串連一起齊嘅地方其實又好鬼熱門。冷門嘅原因除咗係相對少人知可以咁行之外，其中一段要行廢墟小徑同穿林，實際都唔太適合一般郊遊打咭人仕去行。路線大致上分咗3段，頭段全程係市區觀光路線，目的地係今日開始行山嘅小徑起點。如果只係有興趣睇吓點樣由虎豹別墅上紅香爐峰，可以直接跳去part2。第三段開始係熱門嘅港島徑去山頂，已經行過好多次其實冇乜特別嘢好講，目的只係為咗終點嘅?。
路線：天后>天后古廟>蓮花宮>勵德邨>虎豹別墅>金都馳馬徑>紅香爐峰>小馬山>渣甸山>陽明山莊>布力徑>甘道>白加道>山頂廣場>山頂公園>山頂廣場>白加道>舊山頂道>香雪道>干德道>登山電梯>中環
全長：24.72km
時間：6小時45分
起點係天后站，由A1出口上地面之後就過對面馬路。出口旁邊係巴士總站，唔想搭狗鐵嘅可以考慮座巴士嚟。
呢到有巴士同小巴站。
行程開始，過斑馬線之後轉左再行前少少，然後喺街口轉右入去。
呢條叫留仙街，跟住再行前少少上樓梯。
呢條樓梯似乎都有番咁上下歷史，影一影佢先。
上完樓梯之後嚟到天后廟道，跟住再過去對面馬路。之後就轉右沿行人路落斜。
好快就嚟到今日第一個景點天后廟，係法定古蹟嚟架。
屋簷下嘅裝飾做得好精細，夠晒特別。
仲有啲壁畫
附近仲有一棵被斬嘅石墻樹。
參觀完就繼續行程，臨走前影多一張相先。
啱啱由則門入嚟，到走嗰時先發現正門呢邊有資料介紹呢座天后古廟。我呢啲敷淺嘅人通常只會影相冇心機去睇呢啲嘢，今次睇咗呢個介紹感覺有所得著(不過仍然係咁敷淺?)。
原來係咁，唔知陣間要上去嗰個紅香爐峰個名同呢件事有冇少少關連呢??其實以地圖上嘅位置嚟睇，天后廟後面座山正正就係家陣嘅紅香爐峰。喺百幾二百年前冇高樓大廈，天后廟仲係喺海邊嘅時候，由海邊望埋嚟廟後面嘅山峰就係紅香峰了。其實天后保佑漁民，所以天后廟一定係起喺海邊。不過今時今日好多時天后廟都會喺”內陸”出現，如果唔係因為特別原因搬廟，就係因為填海將海邊變成內陸了。呢個算唔算係香港特色呢？
繼續行程，沿斜路行出去街口之後就轉左。
街口有指示牌，下一站係蓮花宮。沿銅鑼灣道行入去。
經過一間外形幾特別嘅教堂，叫做禮賢會。
講特式呢座近代建築當然唔會夠附近嘅聖馬利亞堂特別，不過順道經過就當係其中一個景點影吓。
嚟到蓮花宮了，呢座細細嘅廟同係一級歷史建築嚟架。好多外國遊客會尊程嚟睇。不過香港人呢，似乎知係關心呢到呢到幾時有錢(庫)借多啲。想知多啲可以去華人廟宇委員會個網站有祥細資料介紹。
好喇，睇完嘢又繼續行程，喺廟旁邊嘅呢條樓梯行上去。唔好睇佢好似好長，其實好少嘢當係熱吓身就得。
話咁快就上到嚟，跟住就行過對面行人路。
望番落去蓮花宮，個形狀真係幾特別㗎喎。
抬高頭望吓，呢個亦係全港獨一無二(形狀)嘅勵德邨。成個双筒望遠鏡咁款。
繼續向前行嚟到屋邨商場，呢到有茶餐廰，7仔同超級市場。雖然啱啱出發冇耐，不過如果要食嘢或者補給都冇問題嘅?。
跟住由呢條樓梯落去。
一落到嚟就會見到好靚同好cute嘅壁畫。
真係幾鬼靚㗎喎?。
繼續沿行人路行到尾轉左，再向前行多一陣就會到虎豹別墅。
呢到有棵石墻樹喎。
其實座巴士就可以嚟到勵德邨同虎豹別墅，不過吓吓座車就冇咗行山嘅樂趣啦。吖，查實仲未開始行山喎。
嚟到虎豹別墅正門，見到隻?。
因為之前試過嚟摸門釘，今日本來冇打算入去參觀虎豹別墅嘅。點知咁好彩佢呢個星期開始放寛咗入場限制，咁真係冇乜理由唔入去睇吓。
由停車場行入去座電梯。
幾特別喎，似係由原來別墅入面保留落嚟嘅公仔。
座電梯上到嚟第一時間就係見到呢幅十八層地嶽嘅壁畫，係以前出名恐佈嘅十八層地嶽壁畫。呢幅係新整嘅，望落就冇乜特別。其實今時今日如果整得迫真恐佈轉個頭會比人投訴都唔定。
開放比遊客睇嘢嘅地方其實唔算多，不過都可以隔住玻璃影吓入面嘅情況。
有個花園平台，加上冇乜人感覺都幾舒服。不過遲啲就唔敢講了。
望埋去幾鬼有氣派。
其實呢到算唔算係別墅大宅嘅正門呢？家陣肯定唔係，入去要用側門。
別墅轉手賣盤拆咗起豪宅，之後又攪”活化”。。。
嘩，啲樓梯睇落去好舊式喎。
別墅有四層高(我估㗎咋)，可惜只係開放咗一層比人參觀。其實有得睇都已經好好了，唔好太多要求。
呢隻門好似拍戲啲場景咁，應該話拍戲啲道具部還原得好真實先啱。
入到嚟大廳，嘩咗一聲出嚟?。好靚，要收返頭先嗰句，道具部做唔到呢啲出嚟。
一場入到嚟，梗係要打咭影個 selfie 先啦。
樓梯都鋪晒地毯，夠晒hi卡屎。
頭先喺出面望呢道玻璃門冇乜等別，原來有底光打起係咁靚嘅。呢個位肯定會成為打咭熱點。
靚到不得了。
連個枱腳都雕龍雕鳯㗎喎，有錢人真係唔同啲。
參觀完了，攞番兩分小冊子返去睇吓先。
參觀完虎豹別墅返出嚟，係時候要行山了。山路入口就係喺停車場正門旁邊條樓梯。
就係由呢個冇標示唔起眼又唔知行去邊嘅樓梯行上去。
》》繼續 part2 行程 》》
發表迴響