今日想去行南大嶼郊遊徑，一來想係試行呢條未去過嘅路段，二來係要睇吓有冇可能用呢段路嚟完成自己嘅縱大嶼走計劃。雖然以橫向距離計係行得遠咗，但相對平坦嘅路又可以慳番唔少體力，似乎有得諗。結果除咗行南大嶼郊遊徑之外臨尾仲試多咗一小段南山古道，夠充實了。至於起步點呢，去伯公坳要座巴士唔係咁就腳，不如遠少少由東涌出發再搭多條360同地塘仔啦。
路線：東涌>360救援徑>昂坪市集>心經簡林>昂坪奇趣徑>法門古道>地塘仔>地塘仔郊遊徑>伯公坳>南大嶼山郊遊徑>南山>南山古道>鹿地塘>銀礦灣泳灘>梅窩碼頭
全長：26.39 km
時間：6小時18分
起點係東薈城，出發之前先影一張相。
沿著東提旁邊嘅行人路去。
見到左邊行人隧道就轉入去。
沿著單車徑旁邊嘅行人路去，行行吓發現呢架包滿口罩嘅單車。到底係裝置藝術定係另類單車鎖呢?
繼續沿單車徑，行到見右邊隧道又轉過去。上地面之後就一直向前行，行到見到行人天橋遠上去。
上到天橋都係一味直行就得。
落天橋之後行多一陣，又有行人天橋。今次唔上去，喺旁邊條路過。
行前少少見右邊呢個路口就轉落去。
之後沿著村路行就得，沿路會見到陣間上去嘅3號塔。
呢段係東澳古道必經路，所以好鬼旺。大量人轉右向大澳出出發。
自從香港爆發武漢肺炎以嚟都冇再嚟行昂坪，記得之前轉灣位有草同好多花，唔知點解家陣冇晒。可惜之前開滿花嘅時候我冇影相。
就嚟到入口，見到個藍天同啲雲就已經開心。
嚟到入口，先前大部分一齊行嘅人都繼續直行入去大澳。少量就轉上樓梯向昂坪進發。
今日天氣真係超正，仲有啲風行得唔算辛苦。
上到嚟3號塔，勁多人。人群聚集，都係繼續行程好啲。
鏡頭一轉又嚟到 deep-v 樓梯，好耐冇喺呢個到影相，原來家陣啲樹已經生到睇唔到另一邊了。
搵番一張 2016 年影嘅相，隔一段時間睇番會發現不知不覺咁唔同咗。所以有時就算係成日去嘅地方都可以影相記錄吓。
嚟到彌勒山轉向站，見到個大佛了。再行多大約20 分鐘就會到市集。
行完條360了，今日帶住個口罩放慢嚟行原來又唔係慢好多咋喎，由東涌上到嚟啱啱好兩粒鐘。
今日市集都算係多人。
本來諗住上到嚟食底雞蛋仔做lunch﹐原來連間鋪都已經執埋???｡以後嚟到昂坪冇辣辣嘅雞蛋仔食了?
好彩仲有7️⃣仔，咁就一於轉食叮噹豆沙包啦?
查實今日行昂坪就係要上一上嚟大佛行個圈，佛誕應吓節吖嘛。
大佛後面望到高清鳯凰山。
打完圈下一站係去埋心經簡林。
喺前焗腸旁邊個路口行入去，路口有指示牌包唔會行錯。
行咗5分鐘就入到嚟心經簡林，除咗啲心經，呢到隻鳯凰都算係景點嚟。
天氣好真係睇乜嘢都覺得係靚啲，最愛藍天白雲。
依？做乜呢碌冇字嘅？定係我唔夠慧根所以乜都睇唔到呢???
跟住下一站係去東山法門，經法門古道落地塘仔。
行完一小段樹木研習徑出到嚟，見到右邊東山法門個牌。
睇吓地圖先，路線係先落地塘仔，之後接郊遊徑上伯公坳。其實我只係貪過癮影吓張地圖，段路之前已經行過，唔係嚟到嚟到先至睇地圖嘅。未行過嘅路段千祈唔好諗住入到山區先至搵地圖嚟睇再自由發揮。
通常由昂行過嚟呢段路都係落東涌，又或者係掉轉由石門甲上嚟。今日係第一次經呢邊逆行上伯公坳。
沿路落去路邊間中會有嘢睇，好似呢個奇怪嘅窿，可能係以前喺到修行嘅僧人攞水嘅地方都唔定。
行多陣嚟到前面有個叫做中道亭嘅涼亭。
涼亭對住路旁一個小徑入口，可以上去羅漢塔，不過呢啲唔係一搬山徑，唔適合一般行山人仕(包括我呢啲小學雞) 去試。
呢幾塊石頭肯定唔係新嘢，但啲字就肯定係。即時聯想起一啲嘢。
“佛子尊師重道”｡ 講起尊重呢樣嘢，時代唔同咗，今時今日已經唔可以假定做某個 role 嘅人就一定值得尊重或者做得啱。當然呢個同教師無關，亦同佛教無關，只係有感而發9嗡一吓。
依，今日掛咗個牌包唔會行錯路撞咗落去。條路係通去寶林襌寺，如果第一次嚟應該100%會行錯。因為點睇都似係左邊條路啱啲，其實係要靠右直去嘅。咁其實係乜事呢？原來係禪七期間會謝絕訪客。
繼續沿路落去會經過襌寺正門，之後就跟指示牌行。
呢個佛像其實係墳墓旁邊，唔知係唔係一位高僧嘅墳墓呢？
落一大輪之後終於嚟到郊遊徑入口，跟住就轉上去。
呢段路2.5公里，上多過落。所以個牌都話要行一粒鐘。
跟住紅色波波路線行。
鏡頭一轉就行到嚟郊遊徑出口，跟住要行多大約500米嘅車路同行人路。
都叫做行完咗一少段，影吓出口個牌先。
離開郊遊徑之後轉右，沿斜路向上行。呢條路係一定唔會有車嘅，因為路口落咗閘。
雖然好鬼熱，但見到咁好天又好鬼開心。
好喇，影完伯公坳呢幾個字就安樂喇。跟住就過對面馬路繼續行程。
巴士站嘅位置係冇得過馬路嘅，要行返轉頭少少。過馬路時係可以望到先前經過嘅3號塔嘅。
跟住唔係要上大東，而係好頽咁經南大嶼郊遊徑去南山。呢段大致上係平路，比起上大東輕鬆好多。不過路程都唔短，大約有7.5公里。要行粒幾鐘先至行得完嘅。
頭段比較多上上落落，中段開始係好好行嘅平路。
行行吓感覺口罩上好似有嘢，眼尾見到有啲綠色以為係樹葉抹一抹佢就繼續行。行多陣塊面都仲係感覺有啲嘢，再抹吓佢好似都抹唔走。唯有除個口罩嚟睇睇，嘩~~原來有條?喺到同我say梗hi?｡唔怪知得好似有嘢喺塊面到爬吓爬吓啦，應該係佢喺啲樹枝吊絲落嚟嘅時候比我(發雞盲) 撞咗埋個口罩到。好啦，比你座順風車帶你行咗一段路，係時候落車喇你。
行行吓條路變得開揚，開始有啲風景睇吓。
正喎，成個長沙都望到晒。
繼續行經過一條非常好水嘅石澗，啲水好清。睇返地圖先至知原來呢條澗嘅上游就係爛頭營上面嘅”天池”。
越嚟越近貝澳了。
哎吔，好慘。間唔仲就會見到呢啲情況，希望隻蟹仔唔係比啲變態嘅行山人仕謀殺啦。喺正路中心有啲奇怪。
行吓行吓又經過另一條澗，今次呢條個源頭係喺二東山附近。
終於都行完條郊遊徑，行出去就可以連接鳯凰徑。
跟住轉入去鳯凰徑，照指示向南山方向行。
呢個位應該好面熟。轉左上大東，轉右去南山。
見到個涼亭就更加面熟，次次都係由呢到轉出去接嶼南路落梅窩。
通常到咗接近日落嘅時間我係唔會試一啲自已未行過嘅路，不過呢段只係得1公里仲係漁記管理嘅山徑，賴嘢機會極微。點計都好過行嶼南路，一於試吓。
1公里，應該唔需要行好耐。
原來呢段古道以小石級為主，非常好跑。結果跑得太爽連一張相都冇影?。跟住見到有村屋，咁應該行完了。
有個牌提示話入村要戴口罩喎，基本上今日全程都戴住?，冇問題。
穿出嚟之後就轉右。
樹上面雞乸咁大隻字寫住梅窩碼頭，包冇錯。
村入面有指示牌，指示跟同地方嘅景點。不過今日時候都唔早了，第時有機會再嚟先至再四維行吓。家陣都係出去碼頭好啲。
向住高樓大廈嘅方向行應該冇錯了。
路邊有指示牌。
繼續直行出去。
跟住轉右沿涌邊行。
有指示牌指示出碼頭方向，btw, 啲雲好靚。
呢到同大澳冇得比，不過都算唔錯吖。
本來出到嚟諗住直接去碼頭座船，不過見到個海灘又想去海邊行吓，結果就行咗過嚟。
沙灘上面發現蝴蝶喎，啲人幾鬼有創意。
其實我呢個大鄉里只係嚟過銀礦灣幾次，次次都係喺海邊行。酒店係第一次行過嚟。
近呢一個星期以嚟每日都好好天，啲雲又靚，攪到我出少嚟一日曬太陽都唔安樂。
終於都嚟到梅窩碼頭，今日行程結束。
路線記錄
Total climbing: 1648 m
Total time: 06:18:22
發表迴響