之前行去赤柱好多時都會由鰂魚涌出發，再經大潭一帶嘅山徑過去。今日想試吓由灣仔出發入去赤柱，行啲未試過嘅路線組合。不過由灣仔出發喺路程上會短咗，為咗唔好太過短癮所以要先兜一兜上山頂，飲完奶先至再落赤柱。如果目標只為入赤柱，其實係可以一開始就行晒成條灣仔峽道，上到司徒拔道就直接轉去布力徑嘅。咁行路程上會縮短一半到大約只得10公里，中途仍然有走佬同補給位置，算得上係易行路線。

路線：藍屋>石水渠街>堅尼地道>灣仔峽道>寶雲道健身徑>寶雲道>馬己仙峽道>蒲魯賢徑>高化利徑>梅道>漆咸徑>白加道>醫院徑>施勳道>種植路>芬尼徑>獅子亭>山頂廣場>山頂公園(來回)>芬尼徑>白加道>山頂道>馬己仙峽道>甘道>布力徑>大潭水塘道>黃泥涌水塘>紫蘿蘭山徑>淺水灣坳>淺水灣天后公園>南灣道>赤柱峽道>環角道>馬坑公園>美利樓
全長：21.2 km
時間：5小時23分

起步點係灣仔嘅藍屋。

沿石水渠街一直行到尾嚟到石水渠街花園，行入去之後就會見到有樓梯上去堅尼地道。花園旁邊有間北帝廟，係法定古蹟嚟架。如果未參觀過不妨入去睇吓。

上到堅尼地道之後就過馬路，跟住轉右沿行人路上去。

行多一陣就會見到喺左手邊嘅灣仔峽道入口。

開始上山了，跟住係一段大斜路，要一直行到上去寶雲道健身徑。

行餐懵上到嚟十字路口，跟住轉右沿寶雲道一直行到尾。如果諗住 skip 山頂直接過布力徑，可以繼續沿斜路上去，行到尾就係司徒拔道。

寶雲道本來就已經係熱門嘅跑步徑，武漢肺炎爆發之後就更加多人。多咗好多嚟散步嘅市民(包括我)。

繼續直行。

行到尾見到馬路，呢到係健身徑嘅盡頭。不過嚟呢到跑步嘅人好多都會繼續跑埋前面呢段。我嚟行山嘅都一樣，繼續直行。

吖，呢個建築物幾特別喎。睇個樣應該有返咁上下歷史，唔知係乜嚟架呢？btw，嗰個黑色垃圾袋已經喺到一段時間了。

沿行人路繼續去。

寶雲道盡頭就係馬己仙峽道，有行過纜車徑嘅山友應該可以即時認到路。

跟住喺前面過馬路。

過馬路之後轉上去蒲魯賢徑。

行到見到路口轉灣位就轉上去高化利徑。

再上多一少段斜路就係梅道。

行完呢條短短嘅高化利徑上到嚟梅道，見到條纜車軌。跟就住過去車站睇睇。

梅道站基本上係一條長樓梯，算係一個幾特別嘅景點。

影完相跟住就喺站後邊嘅漆咸徑繼續上山。

成條漆咸徑大致上係之字形咁上山，每逢見到轉灣位就轉上去就啱，包唔會行錯。

其中一個路口係通去觀音林，今日行入去打個轉。

查實呢到係冇乜特別嘅。

繼續轉上去。

終於都轉完了，上到嚟白加道出口。

跟住就沿白加道直去。

之前次次都係行白加道，今日試吓行醫院徑先。

兜咗個灣上咗嚟另一條路。

前面係種植路。

繼續向前行。

行到呢個路口又轉上去。

再向前行多陣就嚟到獅子亭。

獅子亭個景真係唔錯，難怪係遊客必到景點。

影吓個牌証明自已嚟咗山頂先🤣

跟住就行埋上去山頂公園。

轉個頭就上到嚟觀景台，望一望對面嘅西高山。

跟住飲枝補奶力。

由山頂公園落返嚟山頂廣場，再轉入芬尼徑。開始行過去赤柱。

轉個灣落到嚟白加道站。

入車站影張相先，呢個站好有建築特色，又可以近距離睇到纜車經過，所以差不多每次經過都會行入嚟睇睇。

喺車站影完相上返嚟，跟住就沿白加道一路行到尾。

行到嚟連接住白加道尾嘅山頂道，跟住過對面行人路再轉左。

跟住沿行人路去前面路口。

喺路口轉右沿甘道行落去，留意甘道嘅行人路只係得一少段，之後就要喺馬路旁邊行架喇。

呢段路雖然係少車，但呢條始終係馬路嚟，喺路邊行嘅時候記住要跟左上右落。

甘道盡頭係一個交滙處，可以續行程轉入布力徑去黃泥涌。如果要敗走嘅可以經灣仔峽道行落灣仔，或者直接喺呢到座巴士走。再唔係可以近啲轉入金馬麟山道落去香港仔水塘。

過馬路之後就沿住布力徑一直行到尾。

》》》繼續 part2 行程。