延續 part1 行程，由布力徑出發去黃泥涌，之後再落淺水灣接南區海演長廊入赤柱。
路線：藍屋>石水渠街>堅尼地道>灣仔峽道>寶雲道健身徑>寶雲道>馬己仙峽道>蒲魯賢徑>高化利徑>梅道>漆咸徑>白加道>醫院徑>施勳道>種植路>芬尼徑>獅子亭>山頂廣場>山頂公園(來回)>芬尼徑>白加道>山頂道>馬己仙峽道>甘道>布力徑>大潭水塘道>黃泥涌水塘>紫蘿蘭山徑>淺水灣坳>淺水灣天后公園>南灣道>赤柱峽道>環角道>馬坑公園>美利樓
布力徑入口差唔多係對正甘道，所以由山頂行落嚟一定會見到。今日就咁啱見到一班座巴士上嚟出發嘅山友，唔知佢哋打算行去邊呢❓
除咗中間呢個涼亭係連接港島徑之外，全段布力徑大致上係冇任何枝路嘅。只要沿住主路一直係咁行就可以。過咗呢個涼亭之後係港島徑第4段，沿路遇到嘅山友會更多。
行完條布力徑出到嚟馬路了，吖~其實呢段馬路都仲係叫布力徑，即係未算行完?
出到嚟路就堅係行完仲布力徑了，喺前面轉左。
跟住喺巴士站過馬路，再沿大潭水塘道行上去。
有一段大斜路要上。
再行多陣就嚟到黃泥涌水塘，上去打個轉先。
嘩，都乾塘得好緊要。
水壩上面有地圖板，可以睇到附近嘅山徑資料。除咗打星星嘅衛徑，跟住落嚟要行嘅紫蘿蘭山徑都有標示。
睇完地圖就沿住水壩行到尾再落樓梯。如果之前未嚟過，可能會留意唔到壩尾有條樓梯。
嚟到壩尾落去之後就轉左。
再行多幾步就嚟到紫蘿蘭山徑嘅入口，之後一直沿住條引水道行就得。
呢段路都幾長嘅，好彩只係平路所以好易行。啱晒我呢啲唔想上紫蘿蘭山嘅懶鬼。
引水道並唔係一直伸延到尾嘅，行到中後段山徑會由石屎變成一般嘅泥路。其中有一兩段喺懸崖邊嘅會比較多石，如果遇啱前面有行唔慣嘅山友就一定會出現塞人嘅情況。
見到淺水灣了。
懸崖邊嘅路經過時會有風景睇，但如果有其他人行嘅時候就唔好企定定喺到影相阻Q住人喇。
角度唔同咗，除咗淺水灣仲可以望到孖筋山。行到黐孖筋嘅孖崗山?
紫蘿蘭山徑盡頭係連接衛奕信徑嘅十字路口，轉左可以上紫蘿蘭山，轉右落淺水灣坳。直行就可以去大潭水塘。
今日要落淺水灣坳，轉左。
沿樓梯落去淺水灣坳。
話咁快就到了。
望吓地圖先，跟住要沿小徑剷落去。
沿引水道旁邊直行，好快就會見到小徑入口。
如果繼續沿引水道直去係可以去到赤柱峽道嘅(又長又悶架喎)，唔想行孖崗行到黐筋可以考慮吓。不過如果堅想去赤柱就不妨先剷落淺水灣，之後再接海濱長廊過去。即係嚟梗我要行嘅路線。
轉個頭就沿小徑落到嚟南灣坊，之後再行出去淺水灣道就可以落去海灘。
出到嚟大迴旋處呢條就係淺水灣道，跟住轉右過對面馬路繼續行。
一直行到見到左邊呢條樓梯就轉落去。
好快就落到嚟沙灘，梗係要出海邊行吓啦。
喺海邊行最舒服～
一場嚟到，去埋天后公園打個轉先。
跟住就穿商場出去。
嚟到商場後面嘅海灘道，再沿行人路行上去。
上嚟之後轉左入南灣道。
吖頂～真係戇居，原來天后公園係有路可以直接行上嚟南灣道嘅。下次再嚟知道要點行了。
之後繼續沿南灣道行。
一直行到呢到，留意左手邊有一個樓梯口。跟住就要由呢條樓梯上去。
呢個樓梯口其實唔多起眼，同埋呢個位置太近路邊，上去還好，如果係由樓梯落嚟真係要小心睇車。
上完樓梯之後係一段好清靜嘅小徑，好似冇人行添。
行到小徑盡頭要上樓梯，終於見到有人了。
樓梯上嚟之後係淺水灣道，跟住轉就右過馬路。
過對面之後繼續沿行人路直去。
雖然係同一條路，但行前少少就已經由淺水灣道變成赤柱峽道了。繼續向前行轉個灣就會見到海濱長廊個牌，之後再過馬路。
過馬路之後由個牌後面條樓梯落去。
呢條樓梯感覺好似平時行嗰啲斜坡維修道。
行晒條樓梯落嚟之後就係環角道，跟住轉右沿行人路直去。
地下有個爛鬼牌，不過如果唔識要靠佢搵路應該都未必會搵到。
行到嚟迴旋處就過馬路去對面。
跟住係參觀吓赤柱觀音寺。
頂～原來提早閂門。。。
繼續沿環角路行上去。
好快就會嚟到馬坑公園入口，之後穿馬坑公園就可以落去赤柱市集。
見到其中一個赤柱地標，卜公馬頭。
馬坑公園本身都有啲嘢睇吓架喎。
喺海邊見到一隻幾特別嘅(唔知係咪貝殼類)生物，第一次見。
行完馬坑公園出返嚟美利樓，結束今日行程。
路線記錄
Total climbing: 657 m
Total time: 05:22:35
發表迴響