延續 part1 行程，由虎豹別墅旁邊嘅小徑上去紅香爐。

由於呢段唔係正式山徑，沿路唔會有任何指示。路面狀況唔太適合一般休閒式嘅郊遊人仕，如果要試行但去到又發現唔對路就應該即時原路走頭， 唔好為自己同其他人制做麻煩。更唔好留低垃圾或者係破壞環境。

路線：天后>天后古廟>蓮花宮>勵德邨>虎豹別墅>金都馳馬徑>紅香爐峰>小馬山>渣甸山>陽明山莊>布力徑>甘道>白加道>山頂廣場>山頂公園>山頂廣場>白加道>舊山頂道>香雪道>干德道>登山電梯>中環

由呢條樓梯行上去，頭段係好靚嘅石級。

行上嚟之後好快會見到一啲舊屋遺跡，呢個山頭以前應該係木屋區(唔知叫乜名)，沿路上去會見到好多以前居民留低嘅遺跡。

繼續沿樓梯上去。開始入林之前記住要先做足防蚊措施，呢到啲蚊真係唔講得笑。之前試過天時熱嚟噴晒蚊怕水都死，家陣等到天氣涼先敢再嚟。唔想變豬頭記住要用有 DEET 成分嘅蚊怕水，可以嘅話用 DEET 蚊膏就更好。

開始進入廢村，呢到有水管又有消防龍頭，可能以前呢度住咗唔少人。跟住繼續沿住樓梯上去。

感覺上好似有一段時間冇見過呢啲紅色嘅豬頭，唔肯定係自己行街時冇特別留意，定還是呢啲舊式嘅水龍頭真係少咗。呢款水龍頭三個嘴都係用銅做，因為值錢比人拆(偷)走晒。如果個身唔係用鑄鐵做，可能都一早成個比人鋸走埋了。

沿路一直都有樓梯可以跟住上去，兩旁就有唔少以前居住嘅殘硛。

吖～對上一次行仲好地地，今次嚟條路比塌樹壋咗。好在旁邊都仲有位過去，可以繼續上山。

平時成日口嗡嗡問人有冇電視框，估唔到家陣有個真嘅電視框喺面前😂。

呢個似係醫療器材嚟喎，點解會喺呢啲地方出現呢？原來搵 google 大神問吓好就容易知呢部機用嚟做乜⚡。

繼續跟樓梯向上行，見到廢墟必備嘅生力啤。

沿路見到有疏落嘅電燈柱，全部都係剧斷晒。唔知係咪當年政府安置咗啲居民之後唔想再有人返上山邊住所以拆走晒呢？

繼續上。。。

呢啲碗睇落又好似唔係好耐歷史咁喎。

又見到另一個消防水龍頭，呢個睇落保存得好過喺村口見到嗰個。

唔知呢個石磨唔知有幾多年歷史呢？

之後過埋條小溪繼續上。

最後石屎樓梯會消失，喺附近會見到山路入口同前人留低嘅繩。

再行多一陣就會離開密林區，可以見到個藍天。

繼續上多一小段就會見到第一個分岔路口，行左邊同右邊都可以。左邊會行多少少林路，右邊就可以快啲上到去石屎路，所以通常都會揀右邊。其實行到呢度己經好接近馳馬徑，如果遇啱有人經過係可以聽到上面傳嚟嘅聲。

跟住條路唔駛講都知點行啦。

呢個位睇唔多似有路，但其實係行到上去嘅。

越嚟越近了。

到了，上面就係金督馳馬徑。

上咗嚟之後啲路就易行好多。

行前少少會見到左邊有個路口，如果先前揀左邊繼續穿林就會連接呢條路。咁做乜又要行出去呢？因為想出去影一影相先。

呢到個景其實同紅香爐上面差唔多，最重要係唔需要同人迫(直頭係冇人)。不過好多人上山為嘅並唔係想影張靚嘅風景相，而係要揇住枝標嚟同自己打咭。冇咗枝標吸引力就自然會大減，所以冇人都好正常。

影完相返入馳馬徑，再行多一段就嚟到上峰頂嘅入口。

上峰頂嘅路好明顯，亦有勁多人上上落落，應該好難會唔識路或者行錯。主徑另一邊有條比較多雜草嘅小徑係落去芽菜坑村嘅，望落條路都好似闊咗，可能係多人行咗都唔定。

峰頂上面啲人仲多過旺角，想話影一張冇人嘅想都唔係咁易。跟住仲要去山頂，唔值得浪費時間同人迫，拿臨走人好過。

由紅香爐落返嚟馳馬徑，本來打算原路經馳馬徑行去電台。時間尚早又見左邊呢條樓梯未試過，一於試吓行呢邊睇睇。如果想比較簡單同易行，走回頭繼續沿石屎路(馳馬徑)行去電台會好啲。

一上嚟見到有舊大石寫住小白徑，其實千千萬萬咁多小山徑唔會每一條都有個名。有時見到呢啲都唔知係山友手㾗老作，定真有典故由來。

行多陣嚟到一個十字路口，睇方向應該係繼續直去。

跟住呢個路口轉左。

呢邊啲枝路小徑都幾多，估計家陣應該嚟到A同B嘅分岔路口。目標係要行返入去衛徑，即大約係W015附近。行B會近啲，不過後段係橙虚線仲要穿過”內有惡犬”嘅電台，都係兜遠啲行橙色實線嘅路好啲。早鬼知就唔鬼試新路行馳馬徑啦🤣。

其實唔睇地圖，睇實際路況都係㨂A穩陣啲🤣(雖然我唔太介意穿林)。

揀定路線之後就起行。

吖，呢舊石幾過癮喎，呢個角度望埋去成條蛇🐍咁。

依。。。唔多對路咁喎。地圖上橙色實線一定唔會係呢啲路嚟，應該係跟錯咗路了。

行返轉頭，原來正確山路喺另一邊。不過由呢到落去都有啲崎嶇，有啲意想不到。

依？有個位可以望到紅香爐峰喎，啲人潮好似散咗喇喎。

跟住行右邊條路。

地下有碌矮石柱上面寫住一個我唔係好識嘅字，唔知係乜嚟嘅呢？

繼續行多陣喺遠處見到一條小澗，仲有好多人。

之後沿小徑落去。

最後落到嚟澗邊，跟住沿澗一路行上去。條路好容易行唔需要濕腳嘅。

啲溪水好清，有少少失望係就一條魚仔都冇。算啦，影到隻水鉸剪都好過冇。

最後上到嚟澗頂，見到啲好似係引水道嘅建築。開始認得呢個地方。

嚟到路口有班山友喺到休息梗，跟住就轉左行咗去。行咗一陣諗吓諗吓開始覺得自己行錯咗路(再行就去咗電台了)，雖然認得呢到附近啲路但唔係熟，所以行咗先知行錯😅。

行返轉頭去先前個路口，應該係左邊呢條路先至啱。

轉左之後就沿路直去。

之後經過呢個好特別嘅小山丘，唔知呢到係天然形成，定因為要裝天線要掘個大圓坑喺到。

再行多一段小徑就嚟到發射站。

嚟到小馬山景點，之前行衛徑時成日都會見到佢，今日係第一次行過嚟睇。

睇完發射站就沿小徑行返落去衛徑嘅主路。

過小馬山穚之後上去。

回頭可以望到啱啱睇完嘅天線圓坑同發射站。

奇。。。之前喺啲雜草入面枝爛標忽然之間靚仔晒，翻生了。

行埋呢段樓梯落去就係港島徑。

嚟到衛徑同港島徑嘅滙合位置，之後再過埋個渣甸山就可以去到陽明山莊。

》》繼續 part3 行程 》》