戴住口罩去行山 — 鰂魚直行落赤柱 • Samson's Blog

今日去港島行山，再試吓打直由北向南行。之前玩十字?港島時行為咗落赤柱峽道要兜大圈，今次轉用比較直接嘅小徑由孖崗山引水道落山。路程短咗但難度冇加，有著數?。如果想條路再直一啲，可以跟衛徑由紫崗橋上孖崗山，不過咁玩就冇得 hea 行了。

路線：鰂魚涌>柏架山道>大風坳>大潭水塘>大潭西引水道>淺水灣坳(紫崗橋)>孖崗山引水道>赤柱峽道>佳美道>赤柱市集>黃麻角道>赤柱軍人墳場>黃麻角道>斜炮頂>黃麻角道>赤柱市集
全長：19.33km
時間：4小時20分

起點係鰂魚涌狗鐵站，由A出口開始沿英皇道向太古方向行。如果唔座狗鐵，可考慮座 116 巴士到總站落車再行去鰂魚涌街市起步。

沿英皇道一直行。

一直行到柏架山自然徑個牌就轉右。

向前行多陣就係自然徑嘅入口。

起步~由入口行到去大風坳大約有 3.5 公里嘅路程，全程係斜度唔高嘅斜路，唔會行得好辛苦。

大約用半粒鐘就行到上嚟大風坳了。

跟手就喺涼亭旁邊嘅路落去大潭水塘。

鏡頭一轉就落到嚟水塘主壩。

橫過主壩之後就轉右。

繼續直行多一陣。

出到嚟路口見到條古蹟石橋，影完佢之後就喺佢上面行過對岸。

橫過石橋之後就嚟到大潭西引水道，之後沿路行到尾就連接到竹衛徑第一段落去淺水灣坳。

沿路行一陣好快會見到路旁有一個介紹大潭副水塘工人宿舍嘅牌，喺佢旁邊條路行落去之後就再冇任何指示。其實好耐之前當佢新整咗呢個介紹牌嘅時候試過行落去搵，但當時只係見到”此路不通”嘅牌就掉頭走人了。今日心血來潮又想再去搵吓。

原來宿舍離開引水道介紹牌入口係有一段距離嘅，尾段仲變成係山林小徑。一般以行水塘心態嘅郊遊人仕應該唔會入嚟，正好可以保持呢到可以乾淨清靜，不失為一件好事。

紅磚屋宿舍，似乎保存得幾好喎。

宿舍對開有一個大形建築，大部分都比草遮蓋咗。底部分就有好多個拱門形狀嘅窿，唔知係乜嘢嚟。另外點少得廢墟必備嘅生力啤?，仲有一枝超舊式嘅手電筒?喺個窿入面。

舊式痰罐，應該係之前嚟嘅人手多多放咗喺到。

越行赿奇怪，呢個唔知整嚟做乜架呢？

平台下面有好多個窿，圍住中間嘅主結構。似乎係上面嘅建物冧咗壓穿中間封晒

仲有一架超古老嘅單轆車，呢到之前除咗係宿舍會唔會仲係一個工場嚟呢？

參觀完工人宿舍之後原路行返落嚟引水道繼續行程。

行完大潭西引水道，之後繼續沿山徑行多一陣就會到衛奕信徑。

離遠望到大潭中水塘。

嚟到連接衛奕信徑嘅路口，跟住轉左落樓梯。

前面高高嘅係孖崗山，如果想運動量大啲可以一直沿衛徑行埋上去，落山時去到引水道轉右行一樣得。

落到嚟淺水灣坳，跟住轉右沿引水道一直行。

呢段叫孖崗山引水道，

望到一個人都冇嘅淺水灣。

一直沿引水道行，行到見到右邊山頭嘅配水庫就開始要留意將會喺右邊路旁出現嘅小徑入口。

見到第一個出口，呢個明顯得嚟仲寫埋字，應該冇乜鑊氣。不過我就未試過由呢條路落去。

再行多陣見到第二個小徑入口，呢個冇任何記認指示，但路況唔差，好快就可以行到落去赤柱峽道。

其實行到入嚟條路係出奇地鋪咗石屎，唔係啲乜嘢穿林小徑嚟。

落多一陣見到斜坡維修道，跟住沿樓梯落去就掂。

之前行維修道仲整梗，家陣整好咗好行好多了。

由維修道落到嚟赤柱峽道，過對面馬路再轉右行。

一路向前行到路口就會見到落去嘅樓梯口。

路口轉左。

再由前面呢條樓梯落去。

落嚟之後見到呢條叫環角道，轉左行可以去觀音廟再經馬坑公園落市集。轉右行反而一次都未試過，今日一於試一試。

有去赤柱廣場嘅指示牌，一直沿行人路去就得。

不過應該經馬坑邨都可以過到去市集，行入去睇吓先。

吖，呢到幾特別喎。

嘩～有條龍喺到喎。

原來馬坑邨入面有個咁靚嘅公園仔。

有指示牌，即係應該可以行得啦。

最後穿到出嚟商場。

大王宮。。。。?

跟住沿大街一直行去市集。

嚟到赤柱同個牌影張相証明自己嚟過先。後面座山叫斜炮頂，係跟住落嚟要去嘅地方。

壁畫幾靚喎。

扮吓遊客行市集。

經過八間屋又影一影。上網搵資料知道原來呢度啲屋係因為以前英治時期要喺家陣嘅軍營位置入面起炮台，所以就將啲原居民安置咗嚟呢度。

之後由樓梯上去黃麻角道。

一路沿黃麻角道行，經過封咗嘅聖士提反海灘入口。

嚟到軍人墳場，入去行個圈先。

離開軍人墳場繼續沿黃麻角道行，之後一段就再冇行人路，要靠左喺路邊行。好多去炮台嘅人都係咁行入去，唔會比車車死嘅。

呢條路唔算太多車，但會有雙層巴士經過，唔好當自己係大爺咁行出路中心。

除咗軍營閘口條樓梯，仲有一條山路可以上斜炮頂嘅。沿路行上嚟時只要留意住左邊就一定會見到呢個入口。不過有靚路可以行，都係行靚路好啲。呢條路等遲啲有機會先至再試啦。

行到嚟軍營了，其實炮台喺軍營入面，自從英國佬走咗之後就冇再開放比市民入去。應該以後都唔會再有機會了。巴士站亦因為軍營封咗將總站搬咗出嚟閘口，但名就冇改。所以會 fake 到啲冇查清楚就諗住座巴士嚟參觀炮台嘅人，今日就有對夫婦帶住個細路諗住嚟睇炮台，見個個都行旁邊條樓梯上就諗住跟。其實啲人係諗住上去斜炮頂嘅，正確啲講，啲人係諗住經斜炮頂落去犀牛石。