戴住口罩去行山 — 赤柱行山落灣仔 • Samson's Blog

呢排唔知發乜嘢癲上咗個赤柱癮，經常都行山入去。今日就想試吓行一少段未去過嘅路，睇吓可唔可以搵到一個比起行赤柱東引水道更好嘅方法連接赤柱。所以掉返轉由赤柱市集出發，確保有足夠體力同時間應付任何未知嘅情況，包括搵唔到路敗走?。結果成功搵到赤柱峽道嘅小徑入口，以後可以多一個選項了。見咁高興就一於行埋個孖崗山啦，跟住再順路上一上山頂先至返落灣仔走人。

路線：美利樓>馬坑公園>赤柱觀音寺>環角道>赤柱峽道>赤柱西引水道>衛奕信徑第1段(孖崗山>淺水灣坳>紫蘿蘭山>黃泥涌水塘)>港島徑第4段(布力徑)>灣仔峽>甘道>白加道>山頂廣場>山頂公園(來回)>白加道>中區自然徑(漆咸徑>梅道>高化利徑>蒲魯賢徑>馬己仙峽道)>寶雲道(寶雲道健身徑)>灣仔峽道>堅尼地道>石水渠街>藍屋
全長：20.47 km
時間：6小時25分

入赤柱座小巴就最方便，落老銅喺 sogo 對面嘅渣甸街小巴站上車，話咁快就到。

鏡頭一轉已經入到嚟赤柱，影吓個牌到此一遊先啦。

行去美利樓，用平時嘅終點做今日嘅起點。

起程～一開始係要行入去馬坑公園。

入公園之後行到見到第一條樓梯就轉上去。目標係山頂觀景台，或者係厠所?。

行完第一段樓梯之後，跟住繼續沿右邊條樓梯上去。

最後再上埋前面條樓梯就到山頂，上去之後沿厠所旁邊條路繼續上去。

最後會嚟到馬坑公園嘅環角道出口，旁邊就係觀音寺嘅入口。

上次嚟因為提早閂門入唔到去參觀，今日再經過就順路入去睇吓。

呢個望海觀音都幾特別喎。

其實今日嚟行山真係為咗影相嘅，話說今日係國際針孔日，習慣會帶部機出街影吓相應節。可惜之前買埋買埋啲 packfilm 唔捨得用，結果擺到啲藥水又乾又過期?。不過算啦，家陣影出嚟好似啲幾十年前退晒色嘅舊相咁，都另有一番風味嘅。

參觀完觀音寺出返嚟環角道，轉右繼續向前行。

過咗迴旋處之後繼續沿行人路直去，行到見斑馬線就過去對面。

跟住又再直行，行到見到呢個小徑入口就轉左行上去。

沿呢條僻靜嘅小徑行上去。

上嚟之後就係舂碪角道。

嚟到今日嘅重點 — 搵路上赤柱西引水道。喺路口轉右入去赤柱峽道之後就沿行人路直去。順便介紹吓 Plan B，就係如果衰咗，係可以即時行返轉頭去淺水灣嘅?。

福街鳥，做乜又係有工程❓會唔會又係咁啱封咗我要搵嘅入口呢❓

似乎做梗嘅斜坡工程正正就係我要搵嘅小徑入口，唔通今次一開波就要敗走❓見今日地盤冇人開工，一於過去望吓先。

哦～似乎工程係整梗一條樓梯喎，咁著數❓睇吓睇吓，又似係整梗一條排水級渠多少少。先唔理咁多，行上去睇睇。

轉個灣之後發現有條相當”正路”嘅小徑，望落似係一條多人行嘅路嚟喎。

繼續沿小徑上去，行到見左邊嘅分岔路就轉入去。其實我唔肯定繼續向前行係咪一樣可以上到去引水道，不過感覺似轉左行上去機會大啲。先試吓轉上去。

正～再上去就係引水道了，跟住轉右再行多陣就可以連接到衛徑了。出口掛咗一個封路指示，呢條有可能係山友由引水道落赤柱嘅慣常通道嚟喎。只怪自己小學雞見識少，要到今日今日先至知原來有一條咁嘅路可以行。

諗返轉頭，其實之前間中就會行吓呢段路，應該一定見過路邊呢條不明小徑入口。只係自己一直都冇諗過可以咁樣落赤柱所以冇去深究。

依，見到一條斷咗尾嘅草龍喎。見佢呆滯滯，唔知係咪啱啱比人襲擊完未回魂呢？?

唔覺唔覺，好似行咗好高咁。

好喇，嚟到衛奕信徑第1段。跟住可以行落去座巴士走人喇～?

咁快就座車走，講出嚟都冇人信啦。跟住係要上去孖崗山就真，由呢到開始係好長好長嘅樓梯。

行咗一陣上到嚟觀景台，見有山友喺到影相就費鬼事迫埋去了。繼續上山。

其實已經好耐冇行過呢段路，都唔係好記得之前條路係唔係同依家一樣。感覺好似未見過呢段咁，好可能係自己記錯。

鏡頭一轉已經上完孖崗，開始落山去紫崗橋。前面嗰個咁高嘅係乜嚟❓好似話係叫紫蘿蘭山，好似話要行埋上去喎?。

轉個頭又落到嚟紫崗橋，跟住可以諗吓陣間點行。

同自己講，只係上一少段樓梯，之後就可以接紫蘿蘭山徑去黃泥涌，全程平路好易行架咋。兩位外庸姐姐都係咁講架(又係講出嚟都唔會有人信嘅事?)。

認真地講吓呢個位可以點行，如果行到嚟呢到想投降，最近係經小徑落淺水灣。想轉去鰂魚涌嘅話可以落大潭中水塘，再沿水塘道斜路行返上去。如果要去黃泥涌就點都要上多一段樓梯。

上到嚟分岔路，轉左就係紫蘿蘭山徑，轉右係去大潭副水塘，繼續上係紫蘿蘭山。兩條路都一樣可以去到黃泥涌水塘嘅。跟住又同自己講，頭先係昆你架，一場嚟到冇理由唔上埋山頂嘅，上面風景好靚架喎。

上嚟紫蘿蘭山行到好L攰，用影一張相嘅時間嚟休息吓。回望一吓啱啱行過嘅孖崗山。

另一邊見到大潭中水塘。

終於上到嚟山頂，見到枝標。跟住就可以同自己講，我又昆多你一次喇，其實山頂係冇嘢睇架～???(到底自己係咪精神有問題?)。

見到陽明山莊即係就快到黃泥涌了。

嚟到前面呢個分岔路口，行兩條路都可以。不過今日想跟足衛徑路線行理呢一少段路，所以要繼續直去。

落山時見到遠處嘅聶高信山，陣間會喺佢山腰嘅布力徑經過。

行完呢段衛徑，落去就係大潭水塘道。跟住轉左沿行人路落斜，行多陣就會到黃泥涌水塘。

路口有地圖睇，其實視乎之後要行嘅地方，可以揀行一條近少少嘅路。好似今次咁想過港島徑去山頂，落紫蘿蘭山徑係會順路啲。但如果要跟足官方路線，落嚟大潭水塘道就啱啱好就係衛奕信徑1同港島徑4嘅交接位置。

好快就嚟到黃泥涌水塘，跟住就繼續沿水塘道行落去。

一直行到尾，見到巴士站就過馬路。然後轉左行，去到路口再轉多個灣就係布力徑。

嚟到布力徑就沿旁邊嘅行人路一直去就得了。

一直行一直行，行到見到呢個涼亭就即係差唔多行咗半條布力徑。跟住繼續直去，向灣仔峽進發。

呢段唯一有景睇嘅地方。

布力徑盡頭係灣仔峽，直望嗰條就係甘道。過馬路之後就沿甘道一直向上行。

甘道好似越嚟越多人行，仲要大爺咁行正路中心，完全唔當自己行梗馬路。感覺有唔少山友一進入”行山模式”就會開始無視自己身邊環境，只會掛住同身邊朋友吹水，將行梗嘅路當成個人獨享嘅私家路。喺山徑如是，喺馬路亦如是。

行到嚟甘道盡頭就轉左，沿山頂道行多一陣。

留意住右手邊嘅白加道入口，跟住過就馬路轉入去。

入到白加道之後一直沿路行就得了。

行到嚟白加道尾再轉左上去芬尼徑，之後就到山頂廣場了。

上到嚟山頂嘅地標，梗係要影張 pinhole 先啦。

影完相就上山頂公園打個轉。

飲枝補奶力先。

飲完奶行過觀景台望一望西高山，呢啲咁嘅時勢點都唔會行上去。離遠望吓算數了。

落山了，又再返嚟芬尼徑落去白加道。

今日帶咗部 pinhole 出嚟，梗係要喺呢個招牌位置到影一張。不過家陣纜車冇乜人座，要等好耐先等到佢開車。

由於曝光時間長，架纜車變咗一條長形物體。約水又唔夠攪到冇咗一節，又變色又矇都唔知影咗啲乜嘢出嚟?。不過藝術嘅嘢你識條鐵咩，我話靚就靚啦～?

之後再沿白加道行，嚟到見到漆咸徑個牌就轉入去，落完之後就會到梅道。

轉個頭就落到嚟梅道站，順便分享一吓喺呢個站等影纜車嘅經驗。梅道站位置係喺成段纜車軌中間位置對落，所以永遠只會見到一條鋼纜(冇錯係小學生都識嘅事，但嚟影相嘅未必會為咗呢啲小事去認真思考)。只要睇吓條纜嘅移動方向就可以大約估到纜車位置，如果纜索向係上拉，即係纜車由總車上梗嚟。咁就可以企定定準備影相，又由於呢到係中間位，所以影完向上行嘅纜車轉個頭就可以影埋向下行嘅。相反如果嚟到時見到纜索向下行，即係咁啱兩邊嘅車都走晒，咁就可能要等好耐。因為近來纜車已經唔再係上滿人即開，如果唔想花太多時間等就可以走人了。